воситаҳои ахбори оммаи ҷумҳурӣ ба Намоишгоҳи байналмилалии китоби Теҳрон ташриф овард.

Душанбе, 12 май. - Дар доираи ин чорабинӣ дар як толори намоишгоҳ cафири фавқулодда ва мухтори Ҷумҳурии Тоҷикистон дар Ҷумҳурии Исломии Эрон Давлаталӣ Ҳотамов бо аъзои ҳайат мулоқот ороста, дар бораи вазъ ва дурнамои ҳамкориҳои Тоҷикистон бо Эрон, нақшаҳои сафорат барои рушду тавсеаи муносибатҳо маълумот дод. Ӯ тазаккур дод, ки муносибатҳо бо Эрон, ки ҳамёри стратегии табиии Тоҷикистон мебошад, дар сатҳи олӣ қарор доранд ва ҳамкориҳо дар самтҳои зиёд ва қабл аз ҳама дар соҳаҳои иқтисод ва илму фарҳанг пеш мераванд.

Бо ишора ба аҳамияти Намоишгоҳи байналмилалии китоби Теҳрон, ки дар он китобҳои зиёди нашри Эрон ва кишварҳои гуногуни ҷаҳон ба намоиш ва фурӯш гузошта шудаанд, сафир ба ин иқдоми анъанавии Ҷумҳурии Исломии Эрон баҳои баланд дода, онро имконияти хуб барои густариш додани ҳамкориҳо, хусусан дар соҳаи илму маориф ва паҳн кардани дониш номид. Дипломати тоҷик зикр намуд, ки китоб, илму дониш асоси пешрафти ҷомеа мебошанд ва ба ин хотир зарур аст, ки насли ҷавон бештар ба илмҳои дақиқ, техника ва технологияи нав, истифодаи васеи илм дар истеҳсолот рӯ оваранд. Дар пайвастагӣ ба ин мавзӯъ Д. Ҳотамов ёдовар шуд, ки ҳоло дар Эрон 104 донишҷӯи тоҷик таҳсил мекунанд, ки 96 нафари онҳо муҳассилини ихтисосҳои илмҳои ҷамъиятӣ ва забон мебошанд. Ба андешаи ӯ, дар Эрон, ки техника ва технологияи пешрафта, пойгоҳи илмию таълимии замонавӣ дорад, хуб мешуд, ки ҷумҳурии мо мутахассисони соҳаҳои техникӣ ва истеҳсолӣ, муҳандисон, табибон, роҳсозон ва дигар ихтисосмандони барои рушди иқтисоди Тоҷикистон заруриро омода кунад.

Бояд зикр намуд, ки аъзои ҳайати Тоҷикистон тамоми рӯз дар намоишгоҳ пайи шиносоӣ бо китобҳо ва анҷом додани мулоқот буданд. Роҳбари ҳайат – сардори Раёсати иттилоот, матбуот, таҳлил ва тарҳрезии сиёсати хориҷии Вазорати корҳои хориҷӣ Д.Назриев бо мутасаддиёни нашриёти бузургтарини Эрон – «Амири Кабир», «Сурӯш», «Илми фарҳангӣ», инчунин интишороти Вазорати корҳои хориҷии Эрон роҷеъ ба ривоҷ додани ҳамкориҳо дар масъалаҳои табъу нашр мулоқот анҷом дод.

Дар ҳошияи намоишгоҳ қисми ҳайат бо нахустин сафири Эрон дар Тоҷикистон Алиашраф Муҷтаҳиди Шабистарӣ, ки ҳоло раиси Анҷумани дӯстии Эрон ва Тоҷикистон мебошад, вохӯрӣ намуд. Қобили қайд аст, ки анҷумани зикршуда дар ҳамкорӣ бо сафорати Тоҷикистон дар намоишгоҳ ғурфаи алоҳида боз намудааст ва Тоҷикистонро муаррифӣ мекунад. Кормандони Анҷуман ба ҳайати Тоҷикистон кӯмак мерасонанд.

12 май ҳайати Тоҷикистон дар намоишгоҳ иштирок мекунанд. Дар баробари ин гурӯҳҳои хурд бо хоҳиш ва ташаббуси худ аз шаҳрҳои Ҳамадон ва Табрез дидан мекунанд, ки мақсад қабл аз ҳама зиёрати оромгоҳҳои фарзандони бузурги халқи тоҷик Абӯалӣ ибни Сино ва Камоли Хуҷандӣ мебошад.

13 май сафари ҳайат ба шаҳри Исфаҳон дар назар дошта шудааст.