Ба ифтихори 20- умин солгарди Истиқлолияти ҶТ ва 100- солагии устод Фазлиддин Шаҳобов аз 10 то 14 майи соли равон дар шаҳри Душанбе Фестивал - симпозиуми байналмилалии «Шашмақом» баргузор мегардад.
Душанбе, 4 май. - Дар Фестивали мазкур гурӯҳҳои маъруфи ҳунарӣ аз кишварҳои Арманистон, Ҷумҳуриҳои Исломии Эрону Афғонистон ва Ҷумҳурии Халқии Хитой иштирок менамоянд.
Тибқи барнома расми кушодашавии Фестивал 10 май дар театри опера ва балети ба номи Садриддин Айнӣ ба нақша гирифта шуда, ҳамчунин вохӯрии меҳмонон бо вазири фарҳанг ва боздиди меҳмонон аз Осорхонаи мусиқии ба номи Гурминҷ Завқибеков дар назар аст.
Мавриди зикр аст, ки бо Фармони Президенти Ҷумҳурии Тоҷикистон Эмомалӣ Раҳмон 12 май Рӯзи «Шашмақом» эълон гардид. Ҳамчунин ин шоҳасари мусиқии касбии классикии халқи тоҷик- «Шашмақом» аз тарафи Созмони байналмилалии ЮНЕСКО ҳамчун ёдгории ҷаҳонии ғайримоддӣ эълон гардид.
Бояд гуфт, ки фестивали мазкур аз силсилаи чорабиниҳои муҳими фарҳангист, ки ба ин санаи тақдирсози миллати тоҷик- ҷашни Истиқлолият бахшида мешавад.
