Бахшида ба 20- умин солгарди Истиқлолияти давлатии Ҷумҳурии Тоҷикистон дар тамоми театрҳои мамлакат намоишномаҳои гуногуни фарҳангӣ- маърифатӣ доир мегарданд.
Душанбе, 29 апрел. - Аз ҷумла, 28 апрел дар театри давлатии русии ба номи Владимир Маяковский намоишномаи «Бо як гул ҳам баҳор мешавад» дар таҳияи ҳунармандони театри ҷумҳуриявии мусиқӣ-драмавии ноҳияи Данғара пешниҳоди тамошобинон гардид.
Мавзӯи намоишнома тарғиби ғояҳои ватандӯстӣ, худшиносии миллӣ, муҳаббат ба арзишҳои миллӣ, ташвиқи дӯстию рафоқат ва тантанаи адолату ҳақиқат буд.
Ҳунармандон нақшҳоро моҳирона иҷро карданд, ки ин аз кори хуби коргардонӣ ва саҳми аҳли эҷод дарак медод.
Иштироки зиёди тамошобинон дар намоишномаҳои фарҳангӣ исботи он аст, ки рӯз аз рӯз таваҷҷӯҳи мардум ба намоишномаҳои театрӣ зиёд гардида, ин ба баланд бардоштани маърифати фарҳангиву худшиносии мардум мусоидат менамояд.
Ҳунармандони театри ҷумҳуриявии мусиқӣ-драмавии ноҳияи Данғара ҳамчунин нақша доранд, ки то 2-юми майи соли ҷорӣ дар театрҳои пойтахт чанд намоишномаи дигар, аз ҷумла «Сухани вопасини модар»-ро пешниҳоди дӯстдорони санъати театрӣ гардонанд.
