Дар киноҷашнвораи «Киш», ки чанд рӯз пеш дар Ҷумҳурии Исломии Эрон баргузор гардид, мукофоти дуюм «Барои коргардони беҳтарин» барои манзараҳои филми «Қиёми рӯз» насиби Носир Саидов гардид.
Душанбе, 29 апрел. - Киноҷашнвораи байналмилалии «Киш» аз 24 то 28 апрел дар ҷазираи Киши халиҷи Форс идома ёфт. Дар он арбобон ва коргардонҳои эҷодкор аз кишварҳои Эрон, Русия, Ироқ, Хитой, Туркия, Арманистон, Қазоқистон, Афғонистон, Ҳиндустон, Урдун, Тоҷикистон, Гурҷистон, Фаронса, Лубнон ва Озарбойҷон иштирок намуданд.
Тибқи суханони манбаъ ба озмун 266 номгӯй филм пешниҳод карда шуд.
Мавриди тазаккур аст, ки филми «Қиёми рӯз»-и Носир Саидов дар киноҷашнвораҳои байналхалқӣ чанд маротиба сазовори мукофот ва ҷоизаҳо гардидааст.
Ҷоизаи «Самандари тиллоӣ» ба филми «Қиёми рӯз» барои беҳтарин кори коргардонӣ дода шудааст.
Филм аз рӯи филмномаи нависандаи тоҷик Сафари Ҳақдод ба навор бардошта шудааст. Оҳангҳои филмро Далер Назаров эҷод намуда, Георгий Дзалаев онро ба навор бардоштааст.
