70-солагии Шоири халқии Тоҷикистон Лоиқ Шералӣ ботантана ҷашн гирифта мешавад.

Душанбе, 26 апрел. - Дар ин хусус қарори махсуси раиси вилояти Суғд Қоҳир Расулзода ба тасвиб расида, ҳайъати кумитаи тадорукот, нақшаи чорабиниҳо ва харҷномаи ҷашн тасдиқ шуд.

Дар чаҳорчӯби чорабиниҳо таъмири хона-музеи шоир дар шаҳри Панҷакент, чопи ашъори мунтахаби Лоиқ Шералӣ, ташкили конфронсҳо, намоиши китобҳои шоир, ташкили «Шоми Лоиқ» дар Хуррамшаҳр ва силсилаи чорабиниҳои дигар дар назар аст.

Бахшида ба 20-солагии Истиқлолияти Ҷумҳурии Тоҷикистон ва 70-солагии Шоири халқии Тоҷикистон Лоиқ Шералӣ маъмурияти муассисаи давлатии қасри ҷавонони шаҳри Хуҷанд озмунҳои иншои беҳтарин, беҳтарин мақолаи илмӣ ва беҳтарин мақолаи хотиравӣ ва беҳтарин шеър дар васфи устод Лоиқ Шералиро барои кулли дӯстдорони адабиёт ва фарҳанг эълон намудааст.

Озмуни беҳтарин иншо дар мавзӯи «Лоиқи имрӯзу фардо» буда, дар озмун хонандагони мактаб, донишҷӯён ва хоҳишмандон метавонанд ширкат варзанд. Иншо бояд на кам аз панҷ саҳифаи дафтар бошад ва дар асоси меъёрҳои тафтиш дар мактаби миёна баҳогузорӣ мешавад. Барои се иншои беҳтарин тӯҳфаҳо муқаррар шудаанд.

Ҳамчунин, иншоҳои беҳтарин дар маҷмӯаи мақолаҳо оид ба зиндагӣ ва осори Лоиқ нашр хоҳанд шуд. Дар озмуни беҳтарин мақолаи илмӣ, беҳтарин мақолаи хотиравӣ ва беҳтарин шеър низ хоҳишмандон, олимон, шоирон ва ҷавонони навқалам метавонанд ширкат варзанд. Беҳтаринҳо бо тӯҳфаҳои хотиравӣ сарфароз мешаванд. Ҳамаи навиштаҳо дар китоби мақолаҳо дар бораи рӯзгор ва осори Лоиқ Шералӣ интишор мешаванд.