Дар Қасри фарҳанги шаҳри Ваҳдат бахшида ба 100 солагии адиби шинохтаи тоҷик Мирзо Турсунзода конфронси илмӣ-адабӣ баргузор гардид.
Ваҳдат, 13 апрел. - Мудири маорифи шаҳри Ваҳдат Сафаралӣ Камолов ба хабарнигори АМИТ «Ховар» иттилоъ дод, ки дар конфронси доиргардида муовини раиси шаҳри Ваҳдат Руқия Раҳматзода, шоири шинохтаи ҷумҳурӣ Мирзо Файзалӣ, сармуҳаррири рӯзномаи «Шаҳриёр» Аҳлиддини Амриддин, рӯзноманигорон Ҳикмати Розиқ ва Абдусаттори Раҳмон иштирок доштанд.
Конфронси мазкур ба ҳаёту фаъолияти адиби шинохта Мирзо Турсунзода бахшида шуд. Сафаралӣ Камолов афзуд, ки дар конфронси мазкур тамоми сардорони шӯъбаҳои назди мақомоти иҷроия, раисони ҷамоату деҳот ва хоҷагиҳо иштирок намуданд. Бахшида ба ин рӯз аз ҷониби толибилмони мактабҳо ва кормандони Қасри фарҳанг аз ашъори пурғановати шоир шеъру сурудҳо дар васфи зан – модар ва Ватан садо доданд.
