Душанбе, 4 апрел. - Ҷоизаи аввали ин ҷашнвора барои намоишномаи «Рӯдакӣ»-и Ҳошим Гадо ба театри Лоҳутӣ ва барои намоишномаи «Ишқи Парӣ»-и коргардон Баҳодур Миралибеков ба театри «Маяковский» дода шуд.

Театри ҷавонон ба номи Маҳмудҷон Воҳидови шаҳри Душанбе бо намоиши «Шабе дур аз ватан»-и коргардон Низом Меликов ва театри Камоли Хуҷандӣ бо «Бозгашти айём»-и Сайрам Исоева соҳиби ҷойи дуюм ва «Дурахши ахтар»-и театри Хоруғу «Шумқадам»-и театри Кӯлоб сазовори ҷои сеюм шуданд.

Намоишномаи «Куштори 114-ум»-и Қурбони Собир, ки намоишномаи ғайриозмунӣ буд, ҷоизаи махсуси Вазорати фарҳанг ва ҳайати доваронро ба даст овард. Ҷоиза барои беҳтарин коргардонро Ҳошим Гадо ва беҳтарин нақши мардро Абдумӯъмин Шарифӣ, ҳунарманди театри ҷавонон соҳиб шуданд. Озмуни театрҳои касбӣ - «Парасту -2011» бо намоишномаи «Рӯдакӣ» дар таҳияи Ҳошим Гадо рӯзи 28-уми марти соли ҷорӣ ифтитоҳ шуда буд. Дар ин ҷашнвора 15 театр аз шаҳру ноҳияҳои мухталифи Тоҷикистон иштирок карданд. Ҳамакнун қарор аст дар шаҳри Душанбе ҷашнвораи байнамилалии театрҳои касбӣ - «Наврӯз-2011» доир шавад, ки дар он бар иловаи кишварҳои Осиёи Марказӣ, Туркманистон, Қазоқистон, Қирғизистон ва Тоҷикистон, инчунин, театрҳои Эрон ва Афғонистон низ иштирок менамоянд. Театри Эрон дар ин ҷашнвора бо намоишномаи «Рӯдакӣ» ширкат менамояд.

Ёдовар мешавем, ки фестивал-озмуни ҷумҳуриявии театрҳои касбӣ «Парасту-2011» дар доираи таҷлили ҷашни 20-умин солгарди Истиқлолияти давлатии Ҷумҳурии Тоҷикистон аз 28 март то 3 апрели соли 2011 дар пойтахти кишвар-шаҳри Душанбе баргузор гардид.