Суғд, 25 март. - Ҷумъабой Сангинов - муовини аввали раиси вилояти Суғд ва доктор Сайидмуҳаммади Ҳусайнӣ- вазири фарҳанг ва иршоди Ҷумҳурии Исломии Эрон зимни мулоқот дар шаҳри Хуҷанд бо зикри муштаракоти фарҳангиву таърихӣ ба таҳким ва рушди минбаъдаи равобити фарҳангиву илмии ду кишвари ҳамхуну ҳамзабони Тоҷикистону Эрон таъкид карданд. Баъдан дар кохи театри ба номи Камоли Хуҷандӣ бо иштироки аҳли зиё ва фарҳангу адаби вилояти Суғд ва донишҷӯёни макотиби олии вилоят бо ҳузури ҳайати баландмақоми вазорати фарҳанг ва иршоди исломӣ ва аҳли фарҳанги Эрон як маҳфили бошукӯҳ баргузор шуд. Суюнхон Рустамов - муовини раиси вилояти Суғд дар маҳфил бо ишора ба фарҳангу забони муштараки тоҷикону эрониён гуфт, ки имрӯзҳо дар тамоми хонадони мардуми тоҷик суруд ва мусиқии эронӣ танинандоз аст, ки ин нишони муҳаббати мардуми тоҷик ба мардуми ҳамзабони Эрон аст.

Доктор Сайидмуҳаммади Ҳусайнӣ - вазири фарҳанг ва иршоди Ҷумҳурии Исломии Эрон бо арзи сипос аз истиқболи самимӣ ва гарми мизбонон гуфт, ки Эрону Тоҷикистон ду кишвари ҳамдину ҳамзабону ҳамфарҳанг ҳастанд ва ин муштаракот пайванди моро боз ҳам қавитар месозад. Ба хотири он ки шаҳри Табрези Эрон оромгоҳи бузургони зиёди ин сарзамин аст, ман пешниҳод намудам то шаҳрҳои Хуҷанду Табрез бародаршаҳр эълон шаванд ва зиёрати мардуми тоҷику эронӣ аз ин ду шаҳр бештар гардад, афзуд ҷаноби Ҳусайнӣ.

Иттилои мазкур ба хабарнигори АМИТ «Ховар» аз ҷонишини сардори шӯъбаи фарҳанги вилоят Ориф Набиев дастрас гардид.