Ба ифтихори ҷашни қадимаю бостонӣ-Наврӯзи ҳуҷастапай имрӯз дар Академияи илмҳои Ҷумҳурии Тоҷикистон нахустин ҳамоиши фарҳангии байналмилалӣ дар иртибот ба таҷлили ҷашни Наврӯз баргузор шуд.
Душанбе, 18 март. - Чорабинии мазкур бо ибтикори Ҳукумати Ҷумҳурии Тоҷикистон, Академияи илмҳои кишвар ва намояндагии дипломатии кишварҳои Афғонистон ва Эрон дар Душанбе гузаронида шуд.
Дар ҳамоиши байналмилалӣ муҳаққиқони се кишвари форсизабон, ки меросбарони ин ҷашни бузурганд, роҷеъ ба паҳлӯҳои гуногун ва арзишманди Наврӯз дар таърих ва тамаддуни мардумони эронӣ ва ҷаҳон ибрози назар карданд. Ба андешаи донишманди саршиноси тоҷик Аскаралӣ Раҷабов бори нахуст дар Душанбе дар чунин сатҳ доир намудани ҳамоиши байналмилалӣ бо ҳузури намояндагону донишмандони се кишвари форсизабон боиси ифтихор ва сарбаландист.
Дар ҳамоиши байналмилалӣ зикр шуд, ки Наврӯз яке аз бузургтарин ҷашнҳои бостонии халқҳои эронинажод аст, ки аз қаъри асрҳо то ба замони мо расидааст. Доир ба Наврӯз, таърихи зуҳури он, вақту замони таҷлили ин ҷашн донишмандону шоирони шаҳири гузаштаи форсизабон Абулқосим Фирдавсӣ, Абурайҳони Берунӣ, Умари Хайёми Нишопурӣ, Садриддини Айнӣ ва дигарон асарҳо таълиф кардаанд. Мутобиқ ба гуфтаи онон Наврӯз рӯзи нав аз Соли нав аст, ки ба аввали фарвардинмоҳи Эрони бостон (ба он Тоҷикистони таърихӣ низ шомил буд), оғози моҳи ҳамали шамсии ҳиҷрӣ ва 21 марти солшумории мелодӣ рост меояд ва он таърихи шаш ҳазорсола дорад.
