рақсу ҳунари мардумӣ фаъолона амал менамояд, аз сафари кишвари афсонавии Ҳиндустон баргашт.
Душанбе, 25 феврал. -Аз 1 - ум то 15 - уми феврали соли ҷорӣ «Чаманоро» дар фестивали байналмилалӣ, ки дар шаҳри Фаридободи Ҷумҳурии Ҳиндустон байни тамоми давлатҳои ҷаҳон баргузор гардид, иштирок намуд. Ҳайати чаҳордаҳнафараи аҳли ҳунарро Вазири фарҳанги Ҷумҳурии Ҳиндустон Кумари Селҷа пазироӣ намуда, меҳмононро бо барномаи фестивал шинос намуд. Рўзи оғози фестивал аз тамоми давлатҳои ҷаҳон намояндагони ҳунари волои рақс гирд омаданд. Ҳар як раққоса мехост бо назокату нафосати нозукбинона, барномаҳои ҷолиб ва рақсҳои мавзун дар дилҳо ҷой гирад. Раққосадухтарони суғдӣ Мастонахону Маликабону ва Кристианаву Лена, Дилбару Фарангис ва Мадинаҳо, ки бори аввал сафар доштанд, аз зебогию хуррамии Ҳиндустон ва меҳмоннавозии халқи он беҳад шод буданд.
Дар фестивали байналмилалӣ аз ҷумҳуриҳои Арабистон, Ўзбекистон, Тайланд, Сурия, Шри -Ланка, Туркия, Россия, умуман зиёда аз 20 давлати ҷаҳон намояндагони аҳли фарҳанг ширкат доштанд. Мақсади баргузории фестивал дарёфти истеъдодҳои нав, омўхтани санъати халқҳои бародар, эҳёи анъанаҳои миллӣ ва пеш аз ҳама дўстии байни онҳо буд.
Гулдухтарони тоҷик тавонистанд бо маҳорати хоса боиси кафкўбии тамошобинон гарданд. Рақсҳои «Базми тоҷикона», «Тўёна», «Ҷони ман», «Кўлобӣ» - ро аҳли нишаст бо хурсандӣ пазируфтанд. Махсусан ба оҳанги дилошўби «Фасли ноз», ки омехтаи рақси тоҷикиву ҳиндӣ буд, ҳаводорон тавонистанд зебогии табиати диёри тоҷикон, муҳаббати бепоёни ҳиндуҳо ва дўстии байни онҳоро тамошо кунанд. Инчунин, рақси шарқиёнаи ҳиндӣ, эронию арабӣ, ки ҳамааш дар як оҳанги мусиқӣ ҷой дошт, тасхиркунандаи қалбҳо буд.
Тоҷикдухтарони моро муяссар шуд, ки бо санъати волои ҷумҳуриҳои бародар ошно гашта, барои хеш таассурот бардоранд, аз анъанаҳои миллӣ ва санъати рақсии эшон бохабар гарданд.
Албатта, чунин муваффақият худ аз худ ба вуҷуд намеояд. Он бо кўшишу талошҳои сарбалетмейстери ансамбли рақсии «Чаманоро», Аълочии фарҳанги Ҷумҳурии Тоҷикистон, дорандаи медали «Хизмати шоиста» Фирўза Аюбҷонова ба даст омадааст.
