Овозхони шинохтаи эстрадаи тоҷик Садриддини Наҷмиддин дар моҳҳои наздик ба Аврупою Канада ба сафари ҳунарӣ баромада, дар шаҳрҳои бузурги Лондон ва Торонто консертҳо намоиш медиҳад.
Душанбе, 25 феврал. - Сафари ҳунарии Садриддини Наҷмиддин ба Аврупо ва Канада бо мусоидати ширкати бритониягии «Қиём интертеймент» ҷараён мегирад. Дар назар аст, ки дар консертҳо дар Аврупою Канада Садриддинро ҳунармандони хориҷӣ, аз ҷумла Фарҳоди Дарё ҳамроҳӣ менамоянд.
Зимни як нишасти матбуотӣ дар ҷамъи хабарнигорон дар Душанбе Садриддини Наҷмиддин гуфт, ки бобати ташаккули санъати волои ҳунари овозхонӣ бояд байни овозхонону шоирон ва оҳангсозони тоҷик ҳамкории қавӣ ба роҳ монда шавад. Зеро ҳамкории устувор самараи нек медиҳад. Бояд тазаккур дод, ки Садриддини Наҷмиддин, яке аз овозхонони саршиноси эстрадаи тоҷик буда, дар муаррифии ҳунари сарояндагӣ мақоми шоистаро касб кардааст. Зеро беш аз 10 сол аст, ки Садриддин дар рӯи саҳнаи тоҷик ва кишварҳои хориҷӣ бо сурудҳои дилошӯби худ қалби ҳазорон мухлисони худро тасхир намудааст. Маҳз истеъдоди баланди сарояндагӣ ба ӯ имкон додааст, ки дар тӯли беш аз 10 соли фаъолияти ҳанарнамоияш 9 албом таҳия намуда, дар онҳо беш аз 100 суруду таронаҳои сароидаашро ҷо диҳад.
Мавриди зикр аст, ки Садриддини Наҷмиддин бо даъвати бародарони бурунмарзии худ ба Русия рафта, рӯзҳои 21-22 феврал ба ифтихори Рӯзи таъсисёбии Артиши милллии Тоҷикистон дар шаҳрҳои Новосибирск ва Ростов бо барномаҳои махсуси консертӣ ҳунарнамоӣ намуда, қалби ҳазорон ҳамватанон ва мухлисони худро шод гардонид.
