Лавҳае, ки мероси умумибашарист
5 январ 2011 | Хонданд: 683 нафар | Фарҳанг
Дар мамнӯъгоҳи таърихии Саразм, ки 15 километр дуртар аз шаҳри Панҷакент воқеъ аст, маросими насби лавҳаи чорметра ба муносибати ба рӯйхати мероси умумибашарии ЮНЕСКО ворид шудани ин ёдгории мансуб ба ҳазораи IV-II-и пеш аз мелод баргузор гардид.
Душанбе, 5 январ. - Дар ин чорабинӣ фаъолони ноҳияи Панҷакент ва меҳмонон аз пойтахти кишвар иштирок намуданд.
Аз хадамоти матбуоти раиси вилояти Суғд иттилоъ доданд, ки раиси шаҳри Панҷакент Хисрав Абдуназаров, ректори донишкадаи омӯзгории шаҳри Панҷакент Муаззам Ансорӣ, директори мамнӯъгоҳи Саразм, номзади илми таърих Абдурауф Раззоқов ва намояндаи ЮНЕСКО дар Ҷумҳурии Тоҷикистон Алишер Аъзамов роҷеъ ба аҳамияти мамнӯъгоҳи таърихии Саразм ҳамчун ёдгории аҳди кишоварзӣ сухан гуфтанд.
Ёдовар мешавем, ки мақоми мероси умумибашарӣ аз ҷониби ЮНЕСКО ба ёдгориҳои табиӣ ва иншооти эъморгашта бо мақсади ҳифз ва маъруфияти бештар дода мешавад.
