Дирӯз маросими ба истифода додани туннели Шаршар баргузор гардид. Дар он гурӯҳи корӣ таҳти роҳбарии муовини аввали вазири нақлиёт ва алоқаи мамлакат Ҷумъахон Зуҳуров ширкат варзид.
Душанбе, 26 август. - Комиссияи давлатӣ 25 август ба сифати кори туннелсозон баҳои мусбат дод.
Ҷ.Зуҳуров ба мутахассисони Корпоратсияи роҳҳои оҳани Ҷумҳурии Мардумии Чин, коргарону мутахассисони маҳаллӣ ва ҳамаи сохтмончиён миннатдорӣ изҳор намуд.
Мухбири АМИТ «Ховар» хабар медиҳад, ки сохтмони туннел соли 2006 шурӯъ гардида буд. Туннели мазкур як қисми роҳи мошингарди «Душанбе - Кӯлоб - Хоруғ - Мурғоб - Қулма» мебошад. Барои тармиму таҷдиди роҳи мазкур тибқи созишномаи Ҳукуматҳои Тоҷикистон ва Чин 118 миллион сомонӣ ҷудо карда шуда буд. Барои сохтмони туннели Шаршар бештар аз 12 миллион сомонӣ сарф карда мешавад. Дарозии туннел 2 километру 223 метр мебошад. Роҳсозон аз ду ҷониби туннел ба масофаи 5 километр роҳи мошингард сохтанд.
Тавассути туннели Шаршар ҳаракати нақлиёт тамоми фаслҳои сол таъмин карда хоҳад шуд.
