Душанбе, 15 сентябр. (ТВ «Сафина», М. Зокиров). - Ин навбат табъи маскунини пойтахтро ҳунармандони ҷавону болаёқати эстрадаи тоҷик дар якҷоягӣ бо дуэтсароёни машҳури Украина-Потап ва Настя болида гардониданд.

Бояд гуфт, ки барои баргузории ин консерти бошукўҳ мақомоти шаҳрдории Душанбе хеле барвақттар майдони 800-солагии Москваи пойтахтро омода карда буданд. Барномаи фарҳангию фароғатиро барои сокинон Вазорати фарҳанги ҷумҳурӣ дар ҳамдастии амиқ бо операторони пешбари алоқаи мобилӣ ва шаҳрдории Душанбе омода карда буданд.
Тавре интизор мерафт аз ин чорабинии фароғатӣ теъдоди зиёди шаҳрнишинон дидан карданд. Махсусан ҳунарнамоии ситораҳои эстрадаи Украина Потап ва Настя, ки дар олами мусиқии муосир хеле машҳуранд, аз ҷониби тамошобинон бо ҳамовозӣ ва кафкўбиҳои зиёд истиқбол ёфт.
Дастандаркорон ин чорабинии бошукўҳи фароғатиро тўҳфаи арзанда ба сокинони мамлакат, махсусан шаҳрнишинони пойтахт унвон карданд.