То 4 июли соли ҷорӣ дар Тоҷикистон беш аз 230,8 ҳазор тонна ғалла ҷамъоварӣ шудааст, ки ин назар ба ҳамин давраи соли гузашта 5 ҳазор тонна кам аст.
Душанбе, 5 июл. - Мувофиқи маълумоти Раёсати растанипарварии Вазорати кишоварзии ҷумҳурӣ то имрӯз 215,3 ҳазор тонна гандум ҷамъоварӣ шудааст, ки нисбат ба ҳамин давраи соли 2010 баробари 3,6 ҳазор тонна кам мебошад.
Дар Тоҷикистон барои кишти ғалла ҷамъ 299,1 ҳазор гектар замин ҷудо карда шудааст, ки дар 223,7 ҳазор гектари он гандум кишт карда мешавад. Ҷамъоварии ғалла дар вилоятҳои Хатлону Суғд ва дар ноҳияҳои тобеи ҷумҳурӣ идома дорад.
Тибқи хабари Раёсати растанипарварии Вазорати кишоварзии мамлакат дар ВМКБ, бинобар тағйир ёфтани вазъи обу ҳаво, маъракаи ҷамъоварии ғалла ҳанӯз шурӯъ нашудааст.
