Хоруғ, 17 июн. - Баробари парвариши гову гӯсола ва бузу гӯсфанд, инчунин дар ин хоҷагӣ 3 сол қабл аз ноҳияи Мурғоб 10 сар қутос харидорӣ шуд. Ҳоло саршумори онҳо ба 30 сар расидааст, ки кулли аъзои хоҷагии «Дастамбӯӣ» ба хулосае омадааст, ки парвариши қутос камхарҷу сердаромад аст.

Коршиносони Раёсати кишоварзии ВМКБ мӯътақид бар онанд, ки қутоспарварӣ дар ҳақиқат ҳам соҳаи камхарҷ асту ҳам сердаромад. Қутоспарварон ҳатто дар фасли зимистон низ дар тараддуди эму хошок ва оғилхонаҳо барои ин чорпо нестанд, зеро он тамоми фасли сол дар кӯҳу биёбонҳо зиста, ғизоро низ аз онҷо мегирад. Аз ин лиҳоз, имрӯз дар Бадахшон ба рушди ин соҳа эътибори ҷиддӣ дода мешавад.

Агар дар даврони Шӯравӣ ба қӯтоспарварӣ асосан сокинони ноҳияи Мурғоб машғул мешуданд, ҳоло кулли навоҳии вилоят ба парвариши қутос таваҷҷӯҳ кардаанд. Соли 1992 дар вилоят 13 ҳазору 590 сар қутос буд. Имрӯз ин теъдод ба 19 ҳазору 892 сар расидааст.