6 июни соли ҷорӣ дар шаҳри Душанбе мулоқоти вазири кишоварзии Тоҷикистон Қосим Қосимов бо намояндаи Барномаи Фонди байналмилалии рушди кишоварзӣ дар Тоҷикистон (IFAD) Кенҷаева Зайнаб баргузор гардид.
Душанбе, 7 июн. - Дар ҷараёни мулоқот масъалаи муҳокимаи густариши ҳамкориҳо дар доираи татбиқи лоиҳаи IFAD - «Рушди чорводорӣ ва чарогоҳҳо дар Тоҷикистон» мавриди баррасӣ қарор гирифт. Қайд карда шуд, ки маротибаи аввал баҳри рушди соҳаи чорводорӣ дар Тоҷикистон тавассути лоиҳаи мазкур 14,5 миллион долари ИМА барои солҳои 2011-2016 ҷудо мегардад. Дар доираи татбиқи ин лоиҳа, дар баробари рушди соҳаи чорводорӣ ва чарогоҳҳо, ба фаъолияти занҳои деҳот, ки сарварии хоҷагиҳоро ба ӯҳда доранд диққати махсус дода мешавад.
Ёдовар мешавем, ки лоиҳаи мазкур, ки бо ташабуси вазортаи кишоварзӣ соли гузашта ба ин ташкилоти бонуфузи байналмилалӣ пешниҳод гардида буд, ба наздикӣ аз тарафи Шӯрои роҳбарикунандаи Фонди мазкур дастгирӣ ёфт. Дар назар аст, ки рӯзҳои наздик намояндагони Ҳукумати Ҷумҳурии Тоҷикистон ба шаҳри Рим, ки дар он ҷо роҳбарияти Фонди байналмилалии рушди кишоварзӣ (IFAD) қарор дорад, сафар намуда, шартномаи грантӣ (қарзи бебозгашт)- ро ба миқдори 14,5 млн. долл. ИМА ба имзо расонанд.
