Бо мақсади пешгирии саривақтӣ ва эмин нигоҳ доштани зироати кишоварзӣ ва хатари зиёдшавии малах «Барномаи давлатии мубориза бар зидди малах барои солҳои 2011 – 2015» таҳия гардид.
Душанбе, 31 май. - Таҳияи барномаи мазкур пеши роҳи паҳншавӣ ва зарароварии малахро ба зироати кишоварзӣ гирифта, барои таъмини амнияти озуқавории мамлакат мусоидат мекунад.
Имрӯзҳо дар майдонҳои хоҷагиҳои кишоварзии ҷумҳурӣ муборизаи зидди малах ва дигар ҳашароти зараррасон босуръат идома дорад.
Тибқи маълумоти фаврии корхонаи ҷумҳуриявии воҳиди давлатии «Мубориза бар зидди малах» то 20 –уми майи соли 2011 паҳншавии малах дар ҷумҳурӣ дар масоҳати 109 ҳазору 975 гектар мушоҳида мешавад ва то ин муддат дар майдони 81 ҳазору 770 гектар коркарди кимиёвии зидди ҳашарот гузаронида шуд. Дар мубориза бар зидди малах ва ҳашароти дигари зараррасон 3 ҳазору 169 нафар одам, 52 адад техникаи дорупошӣ ва 1 588 адад дорупошаки дастӣ истифода мегардад.
