Чорводорӣ соҳаи муҳими хоҷагии халқи мамлакат ба шумор рафта, давоми солҳои охир ба соҳа аз ҷониби Ҳукумати Ҷумҳурии Тоҷикистон аҳамияти ҷиддӣ зоҳир мешавад.
Кӯлоб, 13 май. - Дар ноҳияи кӯҳистони Шӯрообод, ки барои парвариши чорво шароити мусоид дорад, ташкил намудани хоҷагиҳои чорводорӣ вусъат мегирад.
Мувофиқи омори раёсати кишоварзии ноҳия айни замон дар ноҳия саршумори ҳайвони калони шохдор дар секторҳои хоҷагидорӣ ва аҳолӣ рӯ ба афзоиш буда, он имсол ба 23 ҳазору 964 сар расидааст, ки нисбат ба ҳамин давраи соли гузашта 704 сар зиёд мебошад. Саршумори моли майда, аз ҷумла бузу гӯсфанд низ нисбат ба ҳамин давраи соли гузашта 941 сар зиёд шудааст.Чорводорони ноҳияи Шӯрообод дар баробари афзоиш додани саршумори чорво истеҳсоли гӯшту шир ва пӯсту пашмро низ зиёд намуда, бо мақсади захираи дусолаи хӯроки чорво майдони кишти юнучқа ва дигар зироати хӯроки чорворо пайваста васеъ мегардонанд.
Чорводорон мақсад доранд ҷиҳати рушди соҳаи чорводорӣ кӯшиш ба харҷ дода, аз болоравии нархи гӯшту шир дар бозорҳои кишвар ҷилавгирӣ намоянд.
