Хоруғ, 11 май. - Тибқи иттилои сардори Раёсати кишоварзии вилоят Назрӣ Назриев баҳори соли ҷорӣ кормандони Бозрасии назорати давлатии тухмӣ дар вилоят 2 ҳазору 562, 4 тонна тухмии зироати ғалладона ва 6 ҳазору 172 тонна картошкаи тухмиро аз санҷиши ташхисӣ гузаронида барои кишт иҷозат доданд.

Соли равон дар вилоят барои стансияи таҷрибавию кишоварзии «Помир» дар навоҳии Рӯшон ва Ишкошим 101 га замин ҷудо гардид. Корҳои илмию тадқиқотӣ оид ба омӯзиши навъҳои нави картошка аз лиҳози ҳосилнокӣ, тобоварӣ ба шароити маҳал ва устуворӣ ба касалиҳою ҳашароти зараррасон дар бунгоҳҳои таҷрибавии «Рӯшон» идома меёбанд. Соли равон тавассути Институти зироаткорӣ 12 навъи гандуми баҳорӣ вориди стансия гардид.