Бо мақсади пешгирии баландшавии нархи маҳсулоти кишоварзӣ бо супориши раиси шаҳри Душанбе Маҳмадсаид Убайдуллоев аз ҳисоби буҷаи шаҳр барои хариди маҳсулоти кишоварзӣ аз деҳқон маблағи муайян ҷудо гардид.
Душанбе, 5 январ. - Тибқи супориши шаҳрдорӣ, роҳбарияти бозорҳои шаҳр вазифадор гардиданд, ки маблағи аз буҷаи шаҳр ҷудошударо барои хариди маҳсулоти кишоварзӣ истифода намуда, нархро дар бозорҳои пойтахт то 30 фоиз коҳиш диҳанд.
Айни замон, бо супориши шаҳрдорӣ комиссияи депутатии шаҳрӣ оид ба худсарона боло бурдани нархи маҳсулот дар бозорҳои шаҳр назорат мебарад. Гурӯҳи депутатӣ нафақат нархро дар бозор танзим менамояд, балки назорати нархгузориро ба тарзи доимӣ ба роҳ монда, ба шаҳрдорӣ дар давоми ҳар ҳафта аз кори анҷомдода ҳисобот медиҳад.
