Мутобиқ ба Қарори Ҳукумати Ҷумҳурии Тоҷикистон аз панҷуми августи соли 2009, имсол маротибаи сеюм мешавад, ки дар мамлакат 8-октябр Иди миллии Меҳргон ҷашн гирифта хоҳад шуд.
Душанбе, 7 октябр. (ТВ «Сафина», М. Зокиров). – Аз он ки ин ид аслан ба кори кишоварзон бештар вобастагӣ дорад, имсол низ аз ҳама пеш деҳқонону ризқофарон аз иди касбии худ истиқбол карданд. Ба ин муносибат дар Вазорати кишоварзӣ бо иштироки намояндагони ҳукумату парлумон, собиқадорону олимон ва беҳтарин кормандони соҳа ҷамъомади бошукўҳи идона баргузор гардид.
Кишоварзони мамлакатро бо фарорасии ин иди аҷдодӣ аз номи ҳукумати кишвар муовини сарвазир Муродалӣ Алимардонов таҳният гуфта, иброз дошт, ки тўли чанд соли охир дар асоси татбиқи муваффақонаи барномаҳои гуногуни давлатӣ маҳсулнокии заҳмати кишоварзон торафт беҳтару хубтар мешавад. Аз ҷумла иттилоъ дода шуд, ки дар давоми даҳсолаи охир маротибаи аввал маҳз ҳамин сол содироти картошкаю сабзӣ низ ба хориҷи кишвар ба роҳ монда шуда, дар баробари он воридоти як қатор маҳсулоти дигари ғизоӣ, аз қабили шолӣ коҳиш ёфт. Ин маънии онро дорад, ки истеҳсоли ин номгўи маҳсулот дар дохили кишвар афзуда, талаботи худиро таъмин мегардонад. Баҳои деҳқонро бозор медиҳад, гуфт Алимардонов ва фаровонии бозори имрўзаро аз маҳсулнокии кори кишоварзон дар мавсими имсола маънидод кард.
Вазири кишоварзӣ Қосим Қосимов бошад, ҳамаи дастоварду комёбиҳои деҳқонони мамлакатро ба дастгириҳои бевоситаи роҳбарияти давлат, махсусан Президенти кишвар Эмомалӣ Раҳмон нисбат дод. Аввалин маротиба то 1 миллион тонна истеҳсол шудани ғалладона дар ҷумҳурӣ, аввалин маротиба ба бештар аз 20 сентнер расидани ҳосилнокии пахтазор, бори аввал татбиқи 12 барномаи гуногуни давлатӣ дар соҳа ва амсоли инҳо шаҳодати мақоми афзали соҳаи кишоварзӣ дар сиёсати иқтисодии давлату ҳукумат маънидод шуд.
Дар қисмати дуюми ҷамъомади тантанавӣ бахшида ба иди Меҳргон масъулини ҳукумат ва вазорати кишоварзӣ 14 нафар фаъолтарин кормандони соҳаро бо медалу ифтихорнома ва ба андозаи 1000 сомонӣ мукофотпулии Вазорати кишоварзӣ қадршиносӣ карданд. Ин нафарон ҳар кадоме дар номинатсияҳои гуногун, аз қабили Хоҷагии деҳқонии беҳтарин, пахтакори беҳтарин ғаллакори беҳтарин, беҳтарин сабзавоткору картошкапарвар, говдўш, боғбон, паррандапарвару моҳипарвар, механизатор, олими беҳтарин ва амсоли инҳо соҳиби ҷоизаву мукофотҳо шуданд.
