Душанбе, 14 сентябр. - Ба иттилои манбаъ, нақшаи истеҳсоли картошка 351 ҳазору 435 тонна пешбинӣ шудааст, ки аз он 106 ҳазору 812 тоннааш ҷамъоварӣ шудааст. Ин нишондод нисбат ба ҳамин давраи соли 2010 22 ҳазору 643 тонна зиёд аст. Боиси тазаккур аст, ки моҳи сентябри соли 2010 бо вуҷуди нисбат ба имсола 22 ҳазор тонна камтар истеҳсол шудани картошка нархи он дар бозорҳои ҷумҳурӣ бо қимати 1 сомонӣ- 1 сомонию 30 дирам ба савдо бароварда мешуд. Имрӯз баръакс, бо зиёд истеҳсол шудани картошка нархи он дар бозор ба 1 сомонию 90 - 2 сомонию 20 дирам расидааст. Бар замми гаронии нарх сифати картошка хеле паст буда, ба талаботи харидорон ҷавобгӯй нест. Ҳукумати шаҳри Душанбе аз тарафи савдогарон худсарона боло бурдани нархро ба назар гирифта, комиссияи танзимоти нархро таъсис дод. Дар бозорҳои шаҳр касе дар бораи чунин комиссия иттилоъ надорад ва нархи маҳсулот бошад ҳар рӯз баландтар мешавад. Саволи матраҳ ба комиссияи таъсисёфта ин аст, ки он ҳар ҳафта оид ба масъулияти ба зимма доштааш ба шаҳрдорӣ чӣ гуна маълумот пешниҳод мекарда бошад, дар сурате, ки касе аз сокинони шаҳр дар бораи фаъолияти комиссия на тавассути матбуоти даврӣ ва на тавассути радиою телевизиони давлатӣ огаҳ нест.