Муассисаи давлатии «Телевизиони Сафина» мувофиқи Қарори Ҳукумати Ҷумҳурии Тоҷикистон таҳти №308 аз 22 августи соли 2005-ум таъсис ёфта, Ҳукумати Ҷумҳурии Тоҷикистон муассиси расмии он маҳсуб меёбад.

Рўзи 03.09.2005 расо соати 8-и субҳ аввалин барномаи телевизионӣ тариқи эфири шабакаи «Телевизиони Сафина» пахш ва манзури сокинони мамлакат гардид.

Боиси ифтихор аст, ки Президенти Ҷумҳурии Тоҷикистон мўҳтарам Эмомалӣ Раҳмон низ дар маросими бо тантанаи ба фаъолият оғоз намудани Муассисаи давлатии «Телевизиони Сафина» ширкат варзида, шахсан бо пахши тугмачаи дастгоҳи паҳнкунандаи мавҷи телевизионӣ ба фаъолияти боз як шабакаи тозабунёди телевизионӣ дар Тоҷикистони соҳибистиқлол ифтитоҳ бахшид. Сарвари давлат дар ҷараёни суханронии мустақим дар ин рўзи муборак «Телевизиони Сафина» - ро меваи истиқлол маънидод сохта, онро ҳамзамон саҳнаи озоди афкору пайкори тамоми фарҳангиёни кишвар ва инъикосгару таблиғкунандаи фарҳанги волои миллӣ арзёбӣ намуд.

Муассисаи давлатии «Телевизиони Сафина» аз оғоз фаъолияти худро дар асоси талаботи Сарқонуни Ҷумҳурии Тоҷикистон, Қонуни Ҷумҳурии Тоҷикистон «Дар бораи телевизион ва радиошунавонӣ» ва дигар санадҳои меъёриву ҳуқуқии Ҷумҳурии Тоҷикистон ба роҳ мондааст.

Самти асосии фаъолияти Муассисаи давлатии «Телевизиони Сафина» ба инъикосу тарғиби сиёсати пешгирифтаи созандаю бунёдкоронаи Давлату Ҳукумати Ҷумҳурии Тоҷикистон, инчунин истеҳсол ва пахши барномаҳои телевизионии суръатбахшандаи раванди рушди иҷтимоию иқтисодӣ ва фарҳангию маънавии Тоҷикистон, ҷараёни демократикунонии ҷомеъа ва таҳкими муносибатҳои дўстонаи Ҷумҳурии Тоҷикистон бо дигар давлатҳои ҷаҳон равона гардидааст.

Бо Қарори Ҳукумати Ҷумҳурии Тоҷикистон мутахассиси варзида Пиров Маҳмадсаид Шоҳиддинович аввалин директори Муассисаи давлатии «Телевизиони Сафина» таъин карда шуд.
Имрўзҳо «Телевизиони Сафина» зери роҳбарию дастгирии директори он Давлатов Лутфулло Саъдуллоевич бо пешниҳоди барномаву намоишҳои рангини гуногунжанри телевизионӣ миёни тамошобинон маҳбубияти хоса пайдо кардааст.
Дар Муассисаи давлатии «Телевизиони Сафина» идораҳои зерин фаъолият доранд:
- идораи барномаҳои иттилоотӣ - таҳлилии «Навид»;
- идораи барномаҳои «Ҷавонӣ, зебоӣ ва варзиш»;
- идораи барномаҳои «Фарҳангӣ - фароғатӣ»;
- идораи барномаҳои «Эҷод»;
- идораи тиҷорат ва реклама;
- идораи наворбардорон ва тасвирбардорон;
- идораи таҳия ва дубляжи филмҳо;
- идораи студияи сайёри телевизионӣ;
- идораи хизматрасонии бино ва иншоот.
Шўъбаҳои Муассисаи давлатии «Телевизиони Сафина»:
- шўъбаи кадрҳо;
- шўъбаи умумӣ;
- шўъбаи иқтисод ва муҳосибот;
- шўъбаи продюсерӣ;
- бахши хориҷии идораи барномаҳои иттилоотию таҳлилӣ;
- шўъбаи коргардонҳои овоз;
- шўъбаи танзим ва пахши барномаҳо;
- шўъбаи дизайн ва рассомӣ;
- шўъбаи истеҳсолию техникӣ ва техникаи бехатарӣ;
- шўъбаи бойгонӣ;
- шўъбаи васл;
- шўъбаи ороиши саҳна;
- шўъбаи равшандиҳии махсус;
- шўъбаи нақлиёт;
- шўъбаи барқ ва сантехника.

Намояндагиҳои МД «Телевизиони Сафина» дар шаҳрҳои Қўрғонтеппаву Кўлоби вилояти Хатлон, шаҳри Исфараву маркази вилояти Суғд, в.Рашт ва шаҳри Хоруғи ВМКБ ифтитоҳ шуда, бо беҳтарин дастгоҳу таҷҳизоти рақамӣ ва дигар воситаҳои корбарӣ, аз қабили танзимгоҳи рақамӣ, дастгоҳи наворбардории рақамӣ (камера), танзимгоҳи ороишӣ - дизайнерӣ ва ғайра муҷаҳҳаз гардонида шудаанд.
Нуқтаҳои хабарнигории Муассиса низ дар рушду нумўъи «Телевизиони Сафина» саҳмгузор буда, хабару гузоришҳоро аз ҳаёти сиёсиву иқтисодӣ ва иҷтимоиву фарҳангии манотиқи мухталифи мамлакат дар барномаҳо пешниҳод менамоянд.

Аҳли эҷоди Муассиаса тасмим гирифтааст, ки як силсила лоиҳаҳои навро дар соли 2012 мавриди татбиқи амалӣ қарор диҳад. Барномаҳои наву тозае, аз қабили «Нигоҳи роз», «Рўзи нав», «Ҳукм», «Хонадон», «Кашшоф», «Ҳафт ахтар», «Бозёфт», «Ҷавҳар», «Далерон», «Ҷаҳони иқтисод», «Иртибот» ва силсилафилмҳои мустанад айни замон дар ҷараёни таҳия мебошанд.